Joh 20 | MHL | STEP | Aria Sande epa wiiwim Maria, Makdala owow emeria nain iikirap matmat ikiwok. Ikip fuunep nomon ona iiriw upep-puamik nain urufak-na nomona nain iirariwkin aakia ikua.

John 20

Yeesus umep ikok iikirak

(Matiu 28.1-8, Mak 16.1-8, Luk 24.1-12)

1 Aria Sande epa wiiwim Maria, Makdala owow emeria nain iikirap matmat ikiwok. Ikip fuunep nomon ona iiriw upep-puamik nain urufak-na nomona nain iirariwkin aakia ikua. 2 Naap urufap nan-pariw kiremi karuwiw ikip Saimon Pita ne mua oko nain ikos wia maakek, mua eena Yeesus kookalem-ikua nain. Feenap wia maakek, “Yiena Maneka sapuka iiriw aawep amapikiwemik ya. Ne epa kaanek wuamik nain me amisaremik.” 3 Aria wiam erup naap miimap wis pun karuemik. 4 Ne mua oko nain-ke Pita piipuap o kiikir ikip fuunek. 5 Fuunep tepak me ikiwok, oram ineka kuep nomon ona nain urufak-na konima muutiw nan ikua. 6 Ne Pita-ke murarep fuunemi iiwawun kemena ikiwok. Kemena ikiwok-na makena, konima muutiw nan ikaeya urufak. 7 Ne konim oko ikiwosa wasiomamik nain pun nan oram ikua. Baliwep wasiep-puiwkin ikua. 8 Ne mua eena miimep fuunek nain pun kemena ookap ikip naap urufap maek, makena. 9 (Wiam erup naap urufamik, nain Mua Maneka opora Yeesus umep iikirowa maek nain kema me aawemik.) 10 Naap ikok wiam erup nainiw kirep ikiwemik.

Yeesus Makdala owow emeria Maria nain wiar imenarek

(Matiu 28.9-10, Mak 16.9-11)

11 Aria Makdala owow emeria Maria-ke nomon ona nain mamaiya-pa iimarep ikok omem-ikua. Omemi ineka kuep kemena mokakek-na ensel erup wia urufak. Ensel erup nain konim kia wuap Yeesus wuamik epasuma nan-pariw pokap ikemik, oko ikiwos ona-pa ne oko meren ona-pa naap pokap ikemik. 13 Naeya wis-ke Maria nokaremik, “Nee, no moram omomin?” Ne wia maakek, “Yena Maneka efar aawep amapikiwemik. Pikiwep kaanek wuamik-yon aa!” 14 Naap maep kirek-na Yeesus iimarep ikaeya urufak. 15 Miiriram-ikaeya Yeesus-ke nokarek, “No moram omomin? Ne pun naarew akupin?” Maria kema maek, epa fain urufow mua-ke efa nokariya naep maakek, “Sira eliwa, nos-ke o aawep-na baliwep mae. Naeya ikiwep aawinen.” 16 Ne Yeesus-ke unuma teekami “Maria!” naeya miimap kiremi Iibru opora-pa maakek, “Raboni.” (Kemena feenap, “Somek mua”.) 17 Ne maakek, “Yo me efa opa, yo Auwa wiar urupowa eewuar. No ikiwep yo yookam-miemik nain wia maakome, ‘Yo yena Auwa wiar ikiwiyem, o nis pun niena Niawi-ke, yena Mua Maneka, ne niena Mua Maneka nain!’” 18 Naeya kirep ikiwep Yeesus teeria wia maakek. Maneka urufak nain wia maakemi eena o opora maakek nain pun iiwawun maek.

Yeesus ona teeria wiar imenarek

(Matiu 28.16-20, Mak 16.14-18, Luk 24.36-49)

19 Sande nain urer akena Yeesus teeria wi Yuuda wia keker opap koor omopora koonowap kemena-pa ikemik. Nan ikaiwkin Yeesus ona wi gone-pa wiar imenarep wia maakek, “Ni kema sonom eliwa ikeka.” 20 Naap wia maakemi ona wapena ere-erup ne kametkura wia ofakowak. Naeya wi wiena Maneka urufap manek akena kemelamik. 21 Ne naapiw wia maakek, “Ni kema sonom eliwa ikeka. Yo Auwa-ke efa sesekeya ekapem, naapeya yos pun naap nia sesekinen.” 22 Naap maemi opaimik awowa wia fuurami wia maakek, “Ewar Eliwa ni mia-pa niar ikainok. 23 Naeya ni wi mua pina wiar wasirkomowen-na pina nain wiar weeserinon. Ne ni pina me wiar wasirkomowen-na naap wiar ikainon.”

Yeesus Tomas wiar imenarek

24 Aria Yeesus ona teeria wiar imenarek nain mua kuisow nan me ikua. Mua nain unuma Tomas, unum oko Didimus naimik. 25 Aakisa fan ekapeya wi papako-ke maakemik, “I yiena Maneka yiar imenareya urufamik!” Ne wia maakek, “Yo ewur makena-ke me nia nainen. O imenareya yena mokok onaiya urufap wapen tetelka o wapena patot waremik nain epasuma-pa wiar suuwap urufinen, ne kametkura-pa mikamik nain pun opap urufinen. Naap onap-na makena nainen!” Naap maek.

26 Aria murarow Sande-pa Yeesus teeria nainiw koora-pa nan ikemik, ne Tomas pun wiamiya ikua. Omopora wiam upep ikaiwkin Yeesus nainiw gone-pa wiar imenarep wia maakek, “Ni kema sonom eliwiw ikeka.” 27 Ne Tomas maakek, “Nena wapen tetelka feeke suuwap urufe, aa yo wapena-ke. Ne wapena kametkura-pa efa opap furewe. No makena efa naowa nain kema unu-unowa wuowa neek ikainok, makena nae.” 28 Naeya Tomas-ke maakek, “Makena, no yena Maneka-ke, no yena Mua Maneka-ke!” 29 Naap maeya maakek, “No aakisa yo efa urufap makena nain, nain eliwa. Ne wi mua yo me efa urufowa makena naimik nain kema eliw akena ikaikuan.”

Opora fain onom akena

30 Aria iiriw Yeesus ona teeria mokok epa-pa maa miililina unowa onomakek nain papako fan me siisimem. 31 Ne yo siisimem fain urufap maeka, Yeesus-na Krais-ke, Mua Maneka Muuka-ke, naap maowen. Opor makena wiar naemi ni kekanep naap ookam-ikowen-na o unuma-pa anane eliwa ikowa imenowen. Yo naap maeka naep opora unowa nain siisimem.